Kənd təsərrüfatı üçün nəzərdə tutulan vəsait artırılacaq

“Dövlət büdcəsinə edilən dəyişikliklərdə prioritet istiqamətlərə daha çox vəsaitin ayrılması nəzərdə tutulur. Belə ki, işğaldan azad olunan ərazilərin bərpası və yenidən qurulması prioritet olduğu üçün bu istiqamət üzrə dövlət büdcəsindən nəzərdə tutulandan daha çox vəsait ayrılacaq. Bu o deməkdir ki, Qarabağ və Şərqi Zəngəzurun bərpa və yenidənqurma prosesi bu ilin növbəti aylarında da intensiv şəkildə həyata keçiriləcək”.

Xəbər verilir ki, bunu iqtisadçı millət vəkili Vüqar Bayramov deyib.


Onun sözlərinə görə, digər vacib istiqamətlərdən biri də kənd təsərrüfatıdır ki, bu sahəyə də ayrılan vəsaitin artırılması nəzərdə tutulub. Bu istiqamətdə əlavə 100 milyon manat vəsait ayrılacaq. Bu da fermerlərin, kənd təsərrüfatı sahəsində çalışanların daha yaxından dəstəklənməsinə, xərclərinin bir hissəsinin kompensasiya edilməsinə, sosial təminatın gücləndirilməsinə imkan yaradacaq.

Millət vəkili əlavə edib ki, əmək və əhalinin sosial müdafiəsi naziri tərəfindən minimum əməkhaqqının artırılması ilə bağlı təkliflər noyabrın 1-dək təqdim olunacaq:

“Bu istiqamətdə əlavə olaraq 30 milyon manat vəsaitin ayrılması nəzərdə tutulur ki, onun da 25 milyon manatı pensiya təminatı üçün xərclənəcək”.

Becan.az