Orda məni dara cəkiblər... - Ədalət Qarabulud

Orda məni dara cəkiblər...
(Dostum jurnalist İkram Rafiqoğluna)

...Artıq bundan oyanı yox...
Bu şəhər böyük...
Və bu şəhərdə
hamımız bölük-bölük...
Bu şəhərin bu başında
HAQQ SÖZÜ çarmıxa çəkirlər.
Hirsimi-hikkəmi
ayağımın altındakı
asfalta gömmüşəm,
Elə o Dar ağacının yanında
Həzrəti İsaya dönmüşəm...

xxx

Adam kimsən axı;
məni Dar ağacına aparan!
Mənim sucum nə?!
SUSMAQMI?
Nə dəhşət!!!
Sən heç,
mən susum,
o sussun...
Dar ağacının nə vecinə
indi ipi çəkib HAQQ SÖZ
əbədi susdurulacaqsa...
Çəkiləcəksə
Allaha da ölüm ütüsü,
Məhşər günü
dünyanı boğacaq günah tüstüsü...
Eh, tüpürüm belə rüzgara...
Orda mən ənəl-həqqəm, uluyam,
Orada mən Dar ağacının quluyam...

xxx

Allahım, şükür dərgahına,
kimə edək biət?!
Ölüm nə gözəl şey,
ölüm nə gözəl axirət!!!
Amma bir az dur və usan!
Elə bilirsən can almaq,
ruhu susdurmaq
belə asan?!
İndi sənə
xoş gördük, - deyirəm,
Ancaq sabah
zülmətlər boğulacaq
ölümü öldürdüyümüz gün
doğulacaq...
Buna agah ol, Dar ağacı!
Sən də eşit alihəzrət!
Bilirəm, bu səfər də
qurduğun mərəkə
kimisə bitirəcək...
Ancaq
ölənə ŞƏRƏF
öldürənə NİFRƏT gətirəcək!!!

27 mart 2021-ci il.