"Dəyirman" romanı yenidən nəşr olunub

Bu günlərdə məşhur Türkiyə yazıçısı Rəşad Nuri Güntəkinin (1889-1956) yaradıcılığında önəmli yer tutan "Dəyirman" romanı yenidən yayınlanıb.

İlk dəfə Azərbaycan oxucusuna 1994-cü ildə kiril əlifbasında təqdim olunan romanı "Kritika" nəşriyyatının yenidən yayınlaması əsərin aktuallığı, ideya müasirliyi, dərin sosial məzmunu ilə bağlıdır.

Azərbaycan türkcəsində yazıçı Vaqif Sultanlının uyğunlaşdırdığı romanda Osmanlı İmperiyasının son dönəmlərində Anadolunun mərkəzdən uzaq, yoxsul bir qəsəbə olan Sarıpinar əyalətində uydurma zəlzələ xəbərinin böyüyərək ölkənin və bütövlükdə dünyanın gündəminə gəlməsi satirik üslubda təsvir edilir.

Əsərdə rəhbər vəzifədə çalışanların daxili-mənəvi dünyası canlandırılıb, fərdi xarakter cizgiləri ilə seçilən səriştəsiz, intriqaçı dövlət məmuru tipləri yaradılıb.

Romandan hasil olan sonuc budur ki, vəzifə sahibləri, olmayan hadisələri sanki baş vermiş kimi göstərməklə, yanlışları ört-basdır etməklə zəncirvari şəkildə daha böyük problemlərə yol açır, idarəçilik sistemini gülüş hədəfinə çevirərək dövlətin nüfuzunu zədələyir.

Qeyd edək ki, 1987-ci ildə Türkiyədə "Dəyirman" romanının motivləri, Barış Pirhasanın ssenarisi əsasında Arif Yılmaz tərəfindən eyniadlı bədii film çəkilib.

Becan.az