11 İlin Səmimiyyəti, Mücadiləsi və Qüruru: İzmir Kültür və Dayanışma Dərnəyinin Yolu

Bu gün bir dostluğun, bir yurd sevdasının, bir millət mübarizəsinin 11-cü ildönümüdür. Azərbaycanla Türkiyənin könül körpüsünü İzmirin qəlbində yaşadan İzmir Kültür və Dayanışma Dərnəyi bu gün 11 yaşını tamamlayır.

Hər böyük yolun bir ilk addımı var. Bu yol pandemiyada itirdiyimiz, dəyərli başqanımız Mülazim Paşanın inam və əzmlə atdığı addımlarla başlandı. Onun ruhunu yaşadan, davamını gətirən isə bugünkü başqan Eşref Tuna və bu mübarizənin səssiz, fədakar memarlarından biri olan həyat yoldaşı Naime Tuna oldu.

Bu 11 ilin içərisinə nələr sığmadı ki:

- Azərbaycan və Türkiyə qardaşlığını simvolizə edən Azərbaycan Parkı, Xocalı Anıtı, Heydər Əliyev büstü İzmirin mərkəzində ucaldı;

- Evi olmayan neçə ehtiyac sahibi azərbaycanlı ailənin evləri quruldu;

- Müalicəyə ehtiyacı olan neçə xəstəyə yardım əli uzadıldı;

- Tələbələrə təqaüdlər verildi;

- Ailələrə yardım koliləri, qurban payları, Ramazan sovqatları çatdırıldı...

Bu dərnək sadəcə bir qurum olmadı, bir ata ocağı oldu. Mən bu yolda bu ocağın qapısını doğma evim kimi döydüm, hər zaman Eşref bəyin ağsaqqallığını, Naime xanımın ablalığını gördüm.

Bəzən yolumuza daş atanlar oldu… Bizi bir-birimizə düşmən etmək istədilər. Toplantılarda önə çəkilən iki Türk qızını – mən və Roza İbadova – buna görə hədəfə aldılar... Milli duruşumuzdan narahat olan sağdan da gəldi, soldan da... Hətta, Bakının içindən belə buraya burunlarını soxub, haqqımızda yalanlar uyduranlar tapıldı…

Amma unutdular: min Nigar getsə də, min başqası gələcək. Çünki bu, bir şəxs, bir qrup deyil, millət və vətən üçün verilən mübarizədir.

Bu dərnəyə güc qatanlar təkcə adlar deyil, xalqın özüdür, millətin ruhudur.

Bu gün geri baxdıqda ürəyim dolur, gözlərim yaşarır. Mən, başqan Eşref Tuna və onun dəyərli komandasından razıyam. Allah da razı olsun.

Bir millətin hafizəsində iz buraxanlar, tarixə könüldən yazılanları. İzmir Kültür və Dayanışma Dərnəyi də bu xalqın qəlbinə yazılmış bir mübarizə dastanıdır.

Yaşasın Azərbaycan-Türkiyə birliyi!
Yaşasın millət üçün çalışan könül insanları!


Nigar ÖGEDAY,
Becan.az