Deyəndə ki, boşanmalar artır, deyirlər, Belçikada da belədir - Sosioloqdan həyəcan təbili

Dövlət Statistika Komitəsinin məlumatına görə, 2022-ci ildə Azərbaycanda rəsmi olaraq 58 min abort hadisəsi qeydə alınıb.
Bunların çoxu mini abort, qalanı isə dərman vasitələri ilə aparılan abortlardır. 2021-ci ildə isə bu göstərici 46 877 olub. Aradakı böyük fərq onu göstərir ki, bu rəqəm hər il artmaqda davam edir.

Qeyd edək ki, abort etdirənlər arasında yeniyetmələrin də sayının (2100) artdığı müşahidə olunur.

Bəs, günü-gündən artmaqda olan bu problemlə bağlı hansı tədbirlər görülməlidir?

Mövzu ilə bağlı Bakupost.az-a açıqlama verən sosioloq Əhməd Qəşəmoğlu bildirib ki, abortların sayının artması birbaşa boşanmalarla bağlıdır.

Onun sözlərinə görə, cəmiyyətdə bu məsələyə diqqət artırılmalıdır:

“Mövcud statistika mənim ürəyimi ağrıdır. 30 ildir haray çəkirəm, səsimi eşidən yoxdur. Məsələ odur ki, biz humanitar və sosial problemlərimizin həlli ilə dövrün tələb etdiyi şəkildə məşğul olmuruq. Bu işlə məşğul olan insanlar ya problemi dərindən hiss eləmirlər, ya da o onun həllini yolları bəradə aydın təsəvvürləri yoxdur. Təəssüf ki, bu işləri dərindən bilən mütəxəssislərə də əhəmiyyət vermirlər. Vəziyyət günü-gündən mürəkkəbləşir. Ona görə də heç bir problemi səthi həll etmək olmaz. Problemi həll etmək üçün elmi təminat olmalıdır. Bu gün bizim məmurlarımızın elmi təminat barədə aydın təsəvvürü yoxdur".

Sosioloq abortların sayının faciəvi şəkildə artdığını vurğulayıb:

"Hökumətin bu istiqamətdə tədbir görəcək adamları nə etməli olduqlarını bilmirlər. Bu məsələ ilə dövrün tələbinə uyğun, ciddi elmi mərkəzlərin mütəxəssisləri məşğul olmalıdır. Deyəndə ki boşanmalar çoxdur, deyirlər ki, nə olsun, Belçikada da çoxdur. Anlamırlar ki, orda boşanmanın fəsadı tam ayrıdır, biz də isə tamamilə ayrı. Çoxdusa, o demək deyl ki, onlar inkişaf etmiş xalqdır. Boşanmaların çox olması həmin ölkələrin də problemidir”.

Əhməd Qəşəmoğlu qeyd edib ki, abortun sayını artıran daha çox ikinci qız uşağı abortlarıdır:

“Statistikaya əsasən, abort etdirənlər daha çox gənclər deyil. 2014-cu ildən bu tərəfə boşanmalar sanki kütləvi hal alıb. Təzə ailə quran gənc artıq hiss edir ki, boşanacaq, ona görə də uşağı dünyaya gətirmək istəmir.

Abortun sayını artıran səbəblərdən biri həm də ikinci qız uşağı abortudur. Bunu ya birinci uşaqdan sonra ailədə yarana gərginlik səbəbilə boşanmağa hazırlaşan şəxslər edir, ya da oğlan uşağı istəyənlər. Əslində bu məsələnin arxasında dəhşətli problemlər dayanır. Abort edən adam kim olursa-olsun, öz uşağının ölümünə qərar verirsə artıq, onun qəbində bir çox mənəvi dəyərlərə münasibət dəyişir. Bu, psixoloji olaraq belədir. İkinci tərəfdən əgər ailələrin çoxu boşanırsa, yarısı da evdə gərginlik yaşayır. Bu gün Azərbaycanda 80-90 %-dən çox ailədə gərginlik var. Gərginlik olan ailələrdə isə Azərbaycanın sabahı və yeni nəsil böyüyür”.